Достава на храна и лекови во атарот на село Свињишта

Во текот на вчерашниот ден, добивме повик од семејство кое одгледува овци и живее 3 км оддалечено од селото Свињишта, Охридско. Последните врнежи од снег им ги отежнале и онака тешките услови за живот, далеку од цивилизацијата, без струја и вода. Семејството, кое преживува исклучиво од нивните седумдесеттина овци, вели дека имало и поголеми снегови и дека немале никакви проблеми, но оваа година, поради доцнењето на субвенциите за сточарите и снегот кој ги затекна на почетокот од пролетта, се наоѓаат во многу лоша состојба, пред сѐ со основни прехрамбени продукти, како брашно, масло и сл., а секако и резервите на храна за добитокот им се при крај. Планинската Спасителна Служба при Црвен крст Охрид, во соработка со службата за социјално хуманитарна дејност, денес го посети семејството и им достави помош во храна, средства за хигиена, ќебиња, гумени чизми, како и потребни лекови.

Планинската Спасителна Служба, во оваа прилика ги искористи новонабавените АТВ возила, опремени со гасеници за лесно движење во снежни услови, кои се набавени во рамки на проектот „Нови можности за безбеден зимски авантуристички туризам“, финансиран од Европската Унија, ИПА програмата за прекугранична соработка со Албанија. Ја користиме оваа прилика повторно да се заблагодариме на Европската Унија, како и на ЕУ Делегацијата во Скопје за нивната поддршка.

Ефикасноста и мобилноста на ПСС е од огромно значење за ублажување на страдањата на луѓето, како и за поттикнување на населението да се сврти кон природата, со рекреација, спорт или некоја стопанска дејност, сточарство или авантуристички туризам. Знаењето дека секогаш има решение за проблемите кога ситуацијата ќе излезе од контрола и чувството на сигурност кое го пружа нашата спасителна служба, е клучен фактор за остварување на овие активности.

Ги повикуваме и локалните власти, што поскоро да се вклучат со конкретна поддршка на ПСС, бидејќи граѓаните го заслужуваат тоа. Современ и ефикасен систем за спасување на планина и тешко пристапен терен не е луксуз, туку елементарна потреба и демонстрација на одговорност кон сопствениот народ, особено на оние, кои во руралните зони сами се борат со сите предизвици, далеку од модерните цивилизациски придобивки во градовите.

 

 

Две интервенции во еден ден

На 21.02.2021 год. (недела), во 16:35ч. од страна на Итната Медицинска Помош Охрид, беше побарана асистенција од ПСС при интервенција на повредено момче во месноста „Лабино“, кое поради невнимание и подлизнување, се здоби со сериозна повреда во пределот на левото колено. Поради непристапноста на теренот за возилото на Итната Медицинска Помош, Планинската Спасителна Служба ги алармираше  своите волонтери, од кои дел, за среќа живеат во непосредна близина и први стигнаа на местото со приватен пловен објект. Истите ја пренесоа и лекарската екипа, која на повредениот веднаш му укажа лекарска помош за намалување на болките, додека пристигнуваше другиот тим од ПСС со специјализирана опрема за имобилизација и безбеден транспорт. По комплетната имобилизација, повредениот со помош на пловниот објект, беше пренесен до возилото на ИМП и понатаму транспортиран до Специјалната болница за ортопедија и трауматологија „Св. Еразмо“ Охрид, на понатамошен третман. Акцијата заврши во 17:20ч.

Еден час подоцна, во 18:20ч. дежурниот СОС телефон на ПСС повторно заѕвони, но овој пат со пријава и молба за спасување на домашно милениче, мачка, која се качила на дрво, на 15-ина метри висина и веќе четврта вечер не може да слезе. Повторно беше мобилизиран тим од Планинската Спасителна служба, кој се упати кон овоштарникот, во близина на манастирот Св. Наум, каде во 20:00ч. успеа безбедно да го спушти миленичето од високото дрво и да ги смири видно загрижените сопственици.

Планинската Спасителна Служба при Црвен крст Охрид, му посакува брзо закрепнување на повреденото момче и радосни мигови за сопствениците на мачето.

 

НОВА ИНТЕРВЕНЦИЈА на ПСС И АПЕЛ ДО ЈАВНОСТА

Вечерва во 17:35ч., оперативниот центaр на ПСС доби повик за интервенција врз заглавено возило управувано од унгарски државјани, на превојот од регионалниот пат Охрид – Отешево. Ова не е прва ваква интервенција од почетокот на годината. Имено ПСС, во неколку наврати претходно, извлекуваше заглавени возила на истиот патен правец, каде случајно се затекнуваше извршувајќи ги своите редовни активности. Причините поради кои возилата заглавуваат на овој патен правец, пред сѐ произлегуваат од несовесноста на возачите, кои не ја почитуваат забраната за движење на патниот правец во зимски услови, како и несоодветната опрема на возилата за управување со истите во зимски услови.

Планинската Спасителна Служба при Црвен крст Охрид, користи значителен дел од своите ресурси и волонтерски труд за вакви интервенции, кои се предизвикани од несовесноста на поединци, поради што апелираме до јавноста за разбирање и почитување на она што го работиме, со што ќе ни помогнете да бидеме подготвени за делување во сериозни планински несреќи, кога нашите ресурси се од пресудно значење за спасување на човечки животи.

Апелираме до граѓаните, строго да ги почитуваат сообраќајните правила и прописи за користење на овој патен правец, кој во зимски услови не се одржува, поради што е делумно затворен за сообраќај, а во делот од крстосницата на патниот  правец Охрид – Св. Наум до излетничкото место Корита, каде единствено е дозволен сообраќајот, граѓаните да се прилагодат на условите на патот и доколку не поседуваат соодветна опрема за управување со возилата во услови на снег и мраз, воопшто да не го користат истиот, бидејќи најчесто и оваа делница не е соодветно третирана, поради што е целосно прекриена со мраз и не е безбедна за сообраќај.

Aпелираме до надлежните редовно да ја одржуваат делницата до излетничкото место Корита или целосно да го забранат сообраќајот на овој патен правец, кој очигледно претставува сериозна закана за безбедноста на возачите и нивните сопатници.

Ви посакуваме безбедно другарување со природата.

Трагична несреќа на Галичица

Денес во 13:45 часот, оперативниот центар на Планинската Спасителна Служба доби повик за случена несреќа со трактор на шумски пат во близина регионалниот пат Охрид – Отешево, на планината Галичица. Тричлена екипа од ПСС веднаш се упати на терен, а беа известени и СВР Охрид и службата за Итна медицинска помош, кои за жал не можеа ништо да сторат за спас на младото момче, кое управувало со тракторот.

Искрено жалиме за прерано загубениот живот и изразуваме искрено сочувство до семејството.

 

 

Интервенција на ПСС во Струшко

Денес, во 13:25 часот, оперативниот центар на Планинската Спасителна Служба при Црвен крст Охрид беше алармиран од страна на Центарот за управување со кризи, за изгубено лице над автокампот Ливадиште. Според пријавата лицето се наоѓало во лоша состојба, дезориентирано, дехидрирано и видно вознемирено.

Според информациите добиени од операторот на ЦУК, наведеното лице располагало со околу 5% капацитет на батеријата од мобилниот телефон, што придонесе за усложнување на ситуацијата. Оперативниот центар на ПСС, веднаш го контактираше лицето, посочувајќи му ги постапките за безбедно очекување на спасителните тимови и со упатство за негово брзо лоцирање, преку СМС системот за лоцирање. За кратко време беше мобилизиран тим од четири спасители, кој се упати веднаш на терен, а во меѓувреме, преку системот за лоцирање стигна и точната позиција на лицето.

Во 14:10 часот, тимот пристигна на локацијата, каде 37 годишниот стружанец беше затекнат во видно изнемоштена состојба, дехидриран, но со стабилни витални параметри. По кратка интервенција, низ густа вегетација и тешко пристапен терен, лицето беше безбедно евакуирано до теренското возило на ПСС, а потоа транспортирано и до сопствениот дом.

Ја користиме оваа прилика, да апелираме до сите љубители на природата и планините, да ги почитуваат основните правила за движење на планински терен, да се движат во групи од најмалку две лица, да поседуваат соодветна опрема за планираната тура, како и доволно количество храна и течности. Исто така, апелираме да внимаваат и на капацитетот на батериите на мобилните телефони, како и да го имаат меморирано СОС бројот на ПСС, доколку се движат на територијата од општините Охрид, Струга, Вевчани, Дебрца и Ресен.

Повторно интервенција на ПСС за неполн месец

Денес, во 9:39 часот, оперативниот центар на Планинската Спасителна Служба, доби повик од граѓанин кој пријави несреќа што се случила при сеча на дрва, на планински терен на потегот од село Косел кон село Опејнца. Според првичните информации, при сечата, поголемо стебло паднало врз еден од работниците и му нанело сериозни повреди. Местото на несреќата беше лоцирано со помош на СМС системот за лоцирање, по што веднаш беше мобилизирана петчлена екипа која се упати на терен и во 10:12 часот пристигна на местото на несреќата.
Кај повредениот, првично беа констатирани повреди во пределот на градите и десното рамо, како и отворена фрактура на лева потколеница. Му беше укажана прва помош, беше целосно имобилизиран и со теренско возило транспортиран до село Косел, од каде во 11:00 часот го презеде возило на Итната медицинска помош и го пренесе во соодветна здравствена установа на понатамошно лекување.
Ова е седма интервенција на Планинската Спасителна Служба при Црвен крст Охрид од почетокот на годината, со која и покрај КОРОНА кризата, статистички е постигнат рекорден број на интервенции заклучно со месец Јули.
Планинската Спасителна Служба, уште еднаш апелира до сите љубители на планината и до оние кои извршуваат одредени стопански дејности на планина, да бидат повнимателни, да бидат подготвени за основно делување во вонредни ситуации, да бидат соодветно опремени за активноста и условите на теренот, како и навремено да се обратат за помош во случај на несреќа, на дежурниот број на ПСС 13112 или на останатите служби СВР Охрид 192, Брза помош 194 или Центар за управување со кризи 195.
На повредениот му посакуваме брзо опоравување од повредите.

Шеста интервенција на ПСС од почетокот на годината

Оперативниот центар на Планинската Спасителна Служба при Црвен крст Охрид, во 9:00 часот, прими повик од граѓанин за случена несреќа при пад на лице на карпест терен, со кое заедно биле да собираат шумски плодови. За лоцирање на местото на несреќата беше  искористен СМС системот за лоцирање, кој е воспоставен во рамки на проектот „Регионот Oхридско Eзеро – безбедна дестинација за авантуристички туризам“, финансиран од Европската Унија, програма за прекугранична соработка МК-АЛ. Веднаш по лоцирањето на местото на несреќата, два тима на ПСС се упатија на терен, и во 10:35 часот пристигнаа на местото на несреќата. На повреденото лице, веднаш му беше укажана прва помош, беше запрено обилно крварење и изведена имобилизација на целото тело, по што започна сложена постапка за транспорт и евакуација на повредениот. Поради непристапноста на теренот, беше спроведена една од покомплексните акции за евакуација на повреден, при што беа вклучени 7 спасители од ПСС и соодветна опрема за спасување на деликатен технички терен. По 3 часа и 15 минути, во 13:50 часот, повредениот беше предаден на Итната медицинска помош при Здравствен дом Охрид, која му пружи стручна лекарска помош на лице место и го транспортира повредениот до соодветна здравствена институција, на понатамошно лекување.

Со оваа интервенција, која е шеста по ред, се доближуваме до рекорден просек од една интервенција месечно, што уште еднаш укажува на неопходноста од постоење на ефикасен систем за спасување на планина и непристапни терени, особено во регионите во кои интензивно се развиваат различни форми на авантуристички туризам.

Ја користиме оваа прилика, уште еднаш да изразиме голема благодарност за пожртвуваноста на волонтерите од Планинската Спасителна Служба при Црвен крст Охрид, како и на припадниците на СВР Охрид и Итната медицинска помош, кои секогаш максимално се ангажираат да помогнат на тимовите од ПСС.

На повредениот му посакуваме брзо опоравување од повредите и апелираме до сите љубители на планините и природата, кои се движат во пограничниот регион околу Охридското Езеро, при своите авантури, со себе да носат соодветна опрема, како и опрема за укажување на прва помош и мобилни телефони со полна батерија, на кои претходно ќе ја инсталираат апликацијата за брзо алармирање на ПСС или ќе го меморираат посебниот број за СОС повици 13-112, на кој 24 часа, 7 дена во неделата можат да се обратат за помош.

Интервенција за извлекување на повредено лице во сообраќајна несреќа

Денес, во 11:45 часот, оперативниот центар на Планинската Спасителна Служба при Црвен Крст Охрид доби повик од страна на Итната медицинска помош при Здравствен дом Охрид, за асистенција при извлекување на повредено лице, кое со товарно возило излетало од регионалниот пат Охрид – Ресен, во близина на с. Свињишта. Оперативниот центар на ПСС веднаш мобилизира два тима кои со комплетна опрема за спасување на комплексен технички терен во 12:15 часот пристигна на лице место и веднаш започна со извлекување на повредениот. Истиот за среќа беше во свесна состојба, но со тешки повреди на екстремитетите. На местото на несреќата претходно беа пристигнати и припадниците на Територијалната Противпожарна Единица од Охрид кои први му пристапија на повредениот и асистираа при извлекувањето.

Оваа интервенција е петта по ред од почетокот на оваа година, со што уште еднаш се потврдува потребата од постоење на ефикасен систем за спасување на планина и непристапни терени кој е неопходен во најделикатните операции за спасување на човечки животи.

ПСС при Црвен крст Охрид им честита и им изразува огромна благодарност на сите свои членови/волонтери за пожртвуваноста во оваа, како и во изминатите акции, особено оние кои се изведени во периодот од почетокот на пандемијата со корона вирусот, кога и покрај сите останати опасности, личната безбедност е дополнително загрозена. Исто така, сакаме да им изразиме посебна благодарност и на припадниците од ТППЕ Охрид кои дадоа максимум од своите сили за помош на нашата Служба. Веруваме дека наша, а и нивна девиза е „Заедно сме посилни“.

На повредените во оваа тешка сообраќајна несреќа, им посакуваме добро здравје и брзо закрепнување.

Интервенција на Планинската Спасителна Служба

Денес во 12:15 ч. оперативниот центар на Планинската Спасителна Служба при Црвен крст Охрид прими повик од страна на група возачи на планински Off-Road мотори, кои побараа помош за член од групата, кој доживеал несреќа и се стекнал со сериозни повреди на левата натколеница. Местото на несреќата беше лоцирано со помош на GPS координати, по што беше мобилизирана три члена екипа од ПСС, која веднаш се упати на терен. По околу 30 минути Off-Road возење, групата беше лоцирана. И покрај лошите теренски услови, повредениот беше целосно имобилизиран и транспортиран безбедно до специјалната болница за ортопедија и трауматологија „Св. Еразмо“ – Охрид, на понатамошен третман. Акцијата заврши во 14:30 ч. со безбедно враќање на тимот во центарот на Планинската Спасителна Служба.

Поради вонредната состојба, која владее во државата, предизвикана од пандемијата со корона вирусот, тимот на ПСС применуваше дополнителни заштитни мерки за време на интервенцијата, а ја користиме оваа прилика, уште еднаш да апелираме до сите љубители на планината, да се воздржат од авантури и да останат дома, заштитувајќи го своето здравје, но и здравјето на останатите служби, кои делуваат во ургентни ситуации. За да не се повторуваме, во продолжение го споделуваме линкот од апелот кој го објавивме на 25.03.2020 година.

https://pss.org.mk/apel-do-site-lubiteli-na-planinite/

Планинската Спасителна Служба е секогаш подготвена да помогне во случај на несреќа, но во овие тешки моменти за човештвото, Ве повикуваме да ОСТАНЕТЕ ДОМА, со што Вие ќе ни помогнете нам.

Со надеж за брзо надминување на кризата и заеднички планински дружби,

Искрено ваша,

Планинска Спасителна Служба при Црвен крст Охрид

Интервенција на ПСС на превојот „Баба“ на планината Галичица

Планинската Спасителна Служба вечерва интервенираше врз заглавен автомобил на превојот “Баба”, на планината Галичица. Изведувајќи редовни тренажни активности и анализа на состојбата и условите на планината, вечерва екипа на ПСС при Црвен крст Охрид, наиде на заглавен автомобил со двајца патници на превојот “Баба” и со помош на службено теренско возило асистираше во извлекување  на истото од снежните наноси, од кои целосно е блокиран превојот на патниот правец Р-2332, преку планината Галичица. ПСС апелира до љубителите на планината и зимските авантури, да бидат крајно внимателни на овој патен правец, кој во моментов на места има големи снежни наноси, замрзната подлога и одрони, кои ја загрозуваат безбедноста на учесниците во сообраќајот. Потсетуваме и дека истиот патен правец е со ограничен режим на сообраќај во зимскиот период, при што сообраќајот е дозволен само во должина од 9 км, од Трпејца до излетничко место “Корита”, додека останатиот дел е затворен за сообраќај.