За првпат употребено беспилотно летало во акција за пребарување на исчезнато лице

Вчера, во 21:40 часот, Оперативниот центар на Планинската спасителна служба при Црвен крст Охрид прими повик за потрага по повозрасен сограѓанин кој, од засега непознати причини, се упатил кон Студенчишкото Блато.

Поради исклучително тешките услови на теренот – густа вегетација, кал и ноќни услови – во акцијата за првпат беше употребено специјализираното беспилотно летало DJI Mavic 3T, опремено со термална камера. Оваа современа опрема, која неодамна ја набави Црвен крст Охрид, е наменета за операции за пребарување и спасување на изгубени и исчезнати лица на тешко пристапни терени, како и за откривање активни жаришта при шумски пожари на непристапни планински подрачја, кои тешко можат да се забележат со голо око.

Дронот е набавен со финансиска поддршка од Prespa Ohrid Nature Trust (PONT), во рамките на проект што Црвен крст Охрид го спроведува во партнерство со Урсус Спелеос – Скопје и Национален парк Галичица, а кој е насочен кон намалување на последиците од климатските промени и јакнење на капацитетите за одговор при природни непогоди.

Акцијата беше успешно завршена во 23:15 часот со пронаоѓање на лицето, кое, за среќа, беше неповредено.

Во акцијата, покрај спасителите од Планинската спасителна служба при Црвен крст Охрид, учествуваа и припадници на ТППЕ Охрид, како и членови на семејството на исчезнатото лице.

Упатуваме благодарност до сите учесници за нивната брза реакција, професионалност и одлична координација, кои придонесоа акцијата да заврши успешно.

Евакуација на принудно слетан параглајдерист на Галичица

Ова е првата интервенција на Планинската спасителна служба при Црвен крст Охрид во 2026 година.

Во текот на вчерашниот ден, во 15:10 часот, оперативниот центар на Планинската спасителна служба при Црвен крст Охрид прими повик од параглајдинг заедницата со информација дека параглајдерист кој полетал од превојот Баба на планината Галичица, поради неповолни воздушни струења, не бил во можност да продолжи кон вообичаените слетишта на охридската страна.

Како резултат на тоа, пилотот извршил принудно, но безбедно слетување на висорамнината Суво Поле, во централниот дел на Галичица. Поради непроодноста на теренот, големите снежни наноси и значителната оддалеченост од најблискиот пристапен пат, беше побарана интервенција од Планинската спасителна служба.

Веднаш по приемот на повикот, еден тим на ПСС се упати на терен со специјално теренско возило АТВ, опремено со гасеници за движење во снежни услови. И покрај отежнатите услови и ноќното време, во 16:50 часот спасителниот тим успешно пристигна до локацијата, по што параглајдеристот беше безбедно евакуиран и транспортиран до возилото и неговите колеги со кои заедно изведувал летови на Галичица.

Интервенцијата заврши без повреди и без дополнителни компликации.

Апел за зголемена внимателност

Планинската спасителна служба уште еднаш апелира до сите љубители на планинските и воздушните активности за зголемена претпазливост во зимскиот период, имајќи ги предвид дополнителните фактори на ризик – краткиот ден, ниските температури и снежната покривка кои доминираат во планинските подрачја.

Потсетуваме на неопходноста од:

  • почитување на правилата и условите на планината,
  • користење соодветна и комплетна опрема,
  • носење мобилен телефон со полна батерија за навремено известување во случај на потреба.

Планинската спасителна служба при Црвен крст Охрид останува постојано подготвена да помогне, но безбедноста секогаш треба да биде на прво место.

Параглајдинг несреќа на Галичица – брза и сложена интервенција на ПСС

Вчера, околу 18:30 часот, оперативниот центар на Планинската спасителна служба при Црвен крст Охрид прими повик за помош од група параглајдеристи кои летале од падините на Галичица.

Тие пријавија дека нивен пријател, државјанин на Сојузна Република Германија, од засега непознати причини доживеал тежок пад од поголема височина на исклучително непристапен и карпест терен.

За среќа, во тој момент тројца спасители на Планинската спасителна служба се наоѓаа во Планинската куќа „Спиридон“, каде е лоцирана и спасителната станица на ПСС, опремена со специјализирана техничка опрема за интервенции во овој дел од планината. Веднаш по приемот на дојавата, екипата за помалку од 15 минути пристигна до местото на несреќата, изврши примарен преглед и имобилизација на повредениот, по што започна комплексна спасувачка операција и транспорт по стрмен и исклучително тежок терен.

Дополнителна отежнувачка околност претставуваа ноќните услови, во кои се одвиваше поголемиот дел од интервенцијата. И покрај тоа, по повеќе од еден час интензивни активности, во 20:20 часот повреденото лице беше безбедно евакуирано и спуштено до асфалтниот пат кај превојот Баба.

На локацијата, повредениот беше предаден на екипа на Итната медицинска помош од Охрид, по што веднаш беше транспортиран во Специјална болница за ортопедија и трауматологија „Св. Еразмо“. За жал, лекарските прегледи констатираа фрактури на пет пршлени во долниот дел од рбетот.

Планинската спасителна служба му посакува брзо и успешно опоравување на повредениот и упатува апел до сите посетители и љубители на планината за зголемена претпазливост и одговорно однесување при активности на отв

орено, особено во услови на променливо време и скратен дневен период.

ПСС останува постојано на располагање за помош и поддршка, но уште еднаш потсетува дека безбедноста секогаш треба да биде на прво место.

Навремена реакција на ПСС: параглајдерист безбедно евакуиран на Галичица

Вчера, околу 16:30 часот, до оперативниот центар на Планинската спасителна служба при Црвен крст Охрид беше упатен повик за помош од вработен во Национален парк Галичица. На наплатниот пункт „Дервен“, државјанин на Република Турција пријавил дека негов пријател – параглајдерист – принудно слетал во околината на врвот Магаро и има потреба од евакуација.

По воспоставена брза координација и утврдување на точната локација, лицето беше лоцирано на тешко пристапен, карпест терен на западната страна од планината Галичица. Според информациите, несреќата се случила околу 16:00 часот, кога, од засега непознати причини, пилотот изгубил целосна контрола над параглајдерското крило и бил принуден да го активира резервниот падобран. За среќа, при слетувањето не се здобил со физички повреди.

Од моментот на пријавата, оператор на Планинската спасителна служба беше во постојан телефонски контакт со параглајдеристот, со цел да ја следи неговата состојба и да дава насоки. Во исто време, спасувач од ПСС кој се наоѓаше во Планинската куќа „Спиридон“ веднаш се упати кон локацијата, додека дополнителен тим од пет спасители остана во приправност во Охрид, подготвен за интервенција доколку состојбата се усложни.

Околу 18:00 часот, спасувачот безбедно пристигна до параглајдеристот, му обезбеди храна и вода и заедно, безбедно, се упатија кон Планинската куќа „Спиридон“, со што интервенцијата беше успешно завршена.

Со оглед на исклучително тешкиот терен, околностите на настанот и поволниот исход без повреди, оваа интервенција претставува уште еден пример за навремена реакција, добра координација и среќен сплет на околности.

Планинската спасителна служба упатува благодарност до сите вклучени во интервенцијата и на пилотот му посакува безбедни и успешни летови во иднина.

Повик за интервенција на планината Јабланица – ангажирана воздухопловна асистенција

Утрово, оперативниот центар на Планинската спасителна служба при Црвен крст Охрид беше алармиран за интервенција на планината Јабланица, каде женско лице од Струга се здобило со сериозна повреда на скочниот зглоб.

Поради сложеноста на теренот и големата оддалеченост од најблискиот пристапен пат, Планинската спасителна служба се обрати до Центар за управување со кризи со барање за ангажирање на воздухопловна асистенција. Паралелно со тоа, како мерка на претпазливост, беше активиран тим од шест спасители на ПСС, кои со теренско возило се упатија кон планината, со цел пешки да пристапат до повреденото лице доколку не постои можност за интервенција со хеликоптер.

За среќа, во текот на утринските часови беше ангажиран хеликоптер на Министерство за внатрешни работи, кој во содејство со припадници на Специјалната антитерористичка единица е на пат кон местото на настанот. Со оглед на обезбедената воздухопловна поддршка, теренскиот тим на Планинската спасителна служба се повлекува од терен.

Превојот Баба повторно блокиран поради снег – успешна интервенција на Планинската спасителна служба на Галичица

Новиот снег кој наврна во текот на изминатите два дена, во комбинација со силниот североисточен ветер, повторно доведе до создавање снежни наноси и целосно го блокираше превојот Баба на планината Галичица. Поради ваквите неповолни временски услови, патниот правец моментално не е прооден за моторни возила.

Планинската спасителна служба упатува апел до граѓаните и посетителите да не се обидуваат да го минуваат овој превој со возила, со цел да се избегнат опасни ситуации и загрозување на личната безбедност. Се очекува, по стабилизирање на метеоролошките услови, патниот правец повторно да биде ставен во функција.

Во контекст на актуелните услови, на 18.03.2025 година во 16:30 часот, во Регионалниот центар за гранични работи Запад при Министерство за внатрешни работи беше пријавено дека две лица – странски државјани – се заглавени во снежен нанос со возило на подрачјето на Национален парк Галичица и побарале итна помош.

По пријавата, полициски службеници од Полициската станица за граничен надзор и гранични проверки Св. Наум, претставник од Националниот парк Галичица и екипа на Планинската спасителна служба при Црвен крст Охрид веднаш излегоа на терен. На околу 200 метри под црквата „Св. Ѓорѓија“ беа пронајдени лицата J.C. (35) и O.B. (32), државјани на Република Чешка, кои со кампер возило „Мерцедес“ со чешки национални регистарски ознаки останале заглавени во снежен нанос.

Со навремена и координирана интервенција, лицата и возилото беа безбедно извлечени, без последици по нивното здравје. Планинската спасителна служба повторно апелира до јавноста да ги почитува официјалните предупредувања и препораки при движење во планински подрачја во зимски услови.

Уште една несреќа со трагичен крај

Оперативниот центар на Планинската спасителна служба при Црвен крст Охрид во 18:38 часот, на ден 21.10.2024, беше алармиран од секторот за потраги по исчезнати лица при Министерството за внатрешни работи за исчезнување на 60-годишно лице од Струга, со потекло од село Брчево. Според првичните информации, лицето претходниот ден се упатило да собира шумски плодови, но не се вратило во својата викенд-куќа.

Веднаш по приемот на пријавата беше организирана координирана теренска потрага. Во активностите учествуваа три спасители од Планинската спасителна служба при Црвен крст Охрид и водич со куче за пребарување од здружението „Куче Спасител“ – Охрид, во тесна координација со полициски службеници од Струга.

Потрагата се одвиваше во исклучително сложени услови – стрмен, непристапен и густо обраснат терен. По тридневни интензивни активности, во текот на вчерашниот ден, ловци и жители од околните села го лоцираа безживотното тело на исчезнатото лице во атарот на село Глобочица.

По извршениот увид од страна на јавен обвинител и екипа на Министерството за внатрешни работи, беше спроведена технички сложена операција за извлекување на телото од стрмниот терен, реализирана од спасителите на Планинската спасителна служба при Црвен крст Охрид. По евакуацијата, телото беше предадено на надлежните институции за понатамошна постапка.

Планинската спасителна служба изразува длабоко сочувство до семејството и блиските на починатото лице.

Покрај секојдневната борба со огнените стихии, денес и спасувачка операција на ПСС Охрид

Членовите на Планинската Спасителна Служба при Црвен крст Охрид и Алпинистички клуб ПАТАГОНИЈА Охрид со целокупниот расположлив капацитет, веќе 7 дена се вклучени во гасењето на пожарите во охридско, а особено на пожарот во Национален парк Галичица. Вклученоста е главно во логистичка поддршка, обезбедување и достава на храна за тимовите кои гасат, транспорт на луѓе со теренски возила, а на Галичица и со директна вклученост во гасењето на пожарот, поради непристапноста на теренот.
Покрај ангажманот во гасењето на пожарот на Галичица, денес во 13:50ч. преку единствениот повикувачки број 112 и итната медицинска помош од Охрид, добивме повик за спасување на повредена жена, турист од Чешка, која се здобила со скршеница на десна потколеница, планинарејќи на Галичица.
Бидејќи целокупниот потенцијал на ПСС во моментот беше ангажиран, побаравме хеликоптерска асистенција, при што дел од тимовите кои се вклучени во гасењето на пожарот, беа пренасочени во спасувачка операција.
Благодарение на оперативноста на ЦУК и умешноста на пилотите од хеликоптерската единица на МВР, веднаш беше обезбеден хеликоптер, со кој тим од ПСС беше транспортиран до местото на несреќата. Бидејќи тимот беше повлечен директно од терен, беше принуден да изврши имобилизација и транпорт со импровизирани средства. Во 15:30ч. повредената беше пренесена во специјалната болница за ортопедија и трауматологија, а тимот од ПСС се врати да им помогне на пожарникарите и ренџерите од НП Галичица во борбата со огнената стихија.
Се надеваме дека сите овие случувања ќе предизвикаат поголем интерес во иднина за јакнење на сите капацитети за справување со кризи и несреќи, особено во вреднувањето и поддршката на волонтерските тимови од различни специјалности.

Втора интервенција за евакуација на безживотно тело од тешко пристапен планински терен (фото+видео)

Во 15:04ч. оперативниот центар на ПСС при Црвен крст Охрид, доби повик од жител на с. Брежани, Општина Дебрца, со информација дека високо над селото, шеесет годишно лице починало додека собирало шумски плодови. Поради далечината и тешко пристапниот терен, беше побарано вклучување на ПСС, со цел спроведување на брза и безбедна евакуација на телото од починатото лице.

Согласно протоколот за делување на тимовите од ПСС, бидејќи станува збор за несреќа со смртни последици, опертивниот центар случајот го пријави во СВР Охрид, од каде чекавме понатамошни упатства за делување. Во меѓувреме, беа мобилизирани два тима на ПСС. По проверка на пријавата од страна на СВР Охрид, двата тима на ПСС, во придружба на полициски службеник од СВР и еден тим на Итната медицинска помош од Охрид, се упатија на местото на несреќата.

Во 17:00ч. тимовите пристигнаа на местото на настанот, каде од страна на лекар од ИМП беше констатирана смрт, без видливи знаци на насилство. За жал, поради условите во кои настанала смртта, од дежурниот Јавен Обвинител, беше наредено да се изврши увид од страна на Одделот за криминалистичка техника при СВР Охрид, што ја одложи евакуацијата на телото се до 21:15ч. кога тимовите на ПСС го предадоа телото на починатото лице на службата за погребални услуги.

За жал, ова е втора ваква интервенција на ПСС, по онаа која се случи на 23.09.2023, во близина на Прентов мост, кога животот го загуби работник, кој работел на расчистување на далекуводот од вегетација.

Во оваа прилика, апелираме до надлежните институции, за поефикасна координација во иднина, со цел зголемување на ефикасноста, но и редуцирање на опасностите и ризиците за луѓето кои се вклучени во изведување на ваквите операции.

Планинската Спасителна Служба жали за изгубените животи и на семејствата на починатите им изразува искрено сочувство.

Уште една среќна завршница на пребарување по исчезнато лице во Дебрца

На 19.06.2023 година, во 20:55ч., оперативниот центар на ПСС Охрид, од страна на СВР доби пријава за исчезнато женско лице на околу 32 годишна возраст, кое собирало шумски плодови во атарот на с. Горно Средорече.
Веднаш по пријавата, согласно процедурите за пребарување и спасување во вакви ситуации, ПСС во соработка со здружението Куче Спасител излезе на терен со 9 припадници и едно куче за пребарување.
По пристигнување на местото каде последен пат била забележана жената, во координација со членовите на семејството и мештани од соседните села, кои со неколку возила веќе ја пребаруваа пошироката област, во 22:30ч. ја започнавме потрагата, која за жал не даде позитивни резултати.
Поради тешко проодниот терен, во густа дабова шума, акцијата беше прекината во 2:00ч. утринава, со план истата да продолжи веднаш по разденувањето. Во 6:00ч. утрово, тимовите на ПСС повторно се упатија на местото, но за среќа, акцијата беше прекината по 30-ина минути, по дојава од членови на потесното семејство на жената, со информација дека истата е пронајдена жива и неповредена.
На Госпоѓата и семејството им посакуваме брзо опоравување и добро здравје по овој немил настан и ја користиме оваа прилика уште еднаш да апелираме до авантуристите и локалното население кое од различни причини се движи на планина и шумски предели, да бидат внимателни, соодветно опремени за условите, како и да носат со себе доволно количество храна, течности и мобилен телефон со полна батерија.