Остварена средба со директорот на Дирекцијата за Заштита и Спасување

Денес, во просториите на Планинската Спасителна Служба беше одржана средба со г-динот Аднан Џафероски, директор на Дирекцијата за Заштита и Спасување, на која, на наше огромно задоволство, му беа презентирани работата на ПСС при Црвен крст Охрид, новиот оперативен и тренинг центар, како и проектите кои ги спроведуваме со финансиска поддршка од Европската Унија преку програмата за прекугранична соработка со Албанија.

На средбата беа разгледани можностите за идна поблиска соработка меѓу ПСС Охрид и ДЗС, со цел зголемување на безбедноста на граѓаните, како и подобрување на условите за развој на авантуристичкиот туризам.

Раководителот на ПСС при Црвен крст Охрид го информира Директорот Џафероски дека Службата е подготвена да интервенира 24 часа, 7 дена во неделата на територијата која ја покрива (општините: Охрид, Струга, Вевчани, Дебрца , Ресен и Поградец), како и за тоа дека се подготвени да помогнат во спасителни операции на комплициран технички терен на целата територија на нашата држава.

Директорот Џафероски го истакна своето задоволство од делувањето на ПСС при Црвен крст Охрид, истакнувајќи ја подготвеноста за поблиска понатамошна соработка и поддршка на Службата, со цел нејзино интегрирање во системот за заштита и спасување на Република Северна Македонија.

 

Промоција на новиот проект кој ПСС ќе го спроведува со партнерите од регионот

На граничниот премин „Свети Наум“ беше одржана промоција на проектот „Нови можности за безбеден зимски авантуристички туризам“, финансиран од Европската Унија, програма за прекугранична соработка со Република Албанија. Партнери на овој проект, покрај ПСС при Црвен крст Охрид се и алпинистичкиот клуб Патагонија Охрид, општина Дебрца и општина Грамш од Република Албанија. Целта на овој проект е да се подобри социо-економскиот развој на поширокиот охридско-преспански регион преку одржлив развој и промоција на високи стандарди за безбедност во туризмот. За Планинската Спасителна Служба, со овој проект ќе биде обезбедена комплетна опрема за безбедно делување на спасителите во зимски услови, како и специјални теренски возила, опремени со гасеници и приколки за транспорт на повредени лица во снежни услови. Со помош на оваа опрема, значително ќе се подобрат капацитетите на службата, како и нејзината ефикасност, во зимскиот период.

На оваа церемонија Планинската Спасителна Служба при Црвен крст Охрид и Националниот координативен центар за гранично управување потпишаа Меморандум за соработка, чија цел е преку координирани активности спасувачките тимови на службата да можат брзо да ја поминат границата и во најкус можен рок да интервенираат за спасување на Албанска територија. Овој меморандум претставува прв чекор во процесот за креирање на посебен протокол, со кој во иднина Планинската Спасителна Служба, со целокупната опрема, возила и спасувачи, без застој ќе ја минува границата на официјалните гранични премини или на т.н. зелени премини на копно, но и со воздухоплов доколку е тоа непходно за ефикасноста на акцијата. Тоа ќе значи системско подобрување на безбедносните услови во туризмот, но и поголема безбедност на населението од прекуграничниот регион.

Г-динот Сашо Точков, претседател на Црвен крст Охрид истакна дека со воспоставувањето на систем за ефикасно делување на Планинската Спасителна Служба и со почетокот на новиот проект се заокружува долгогодишната заложба за безбедносен систем и услови за сите туристи, љубители на планината, како и за сите жители од овој регион.

Г-дин Никола Бертолини од Секторот за соработка и развој при Делегацијата на ЕУ од своја страна посочи дека Европската  Унија секогаш ги препознавала и ќе ги поддржува и во иднина сите проекти што промовираат прекугранична соработка, како еден од најважните приоритети согласно програмите за поддршка на ЕУ.

 

Свое обраќање имаа и министерот за локална самоуправа, г-дин Горан Милевски, Директорот на Царинска Управа, г-дин Ѓоко Танасоски, како и градоначалниците на општините Дебрца и Грамш, г-дин Зоран Ногачески и г-дин Клодијан Таче, кои го истакнаа своето задоволство од успехот на ваквите проекти, што влијаат не само на економскиот развој на регионот, туку и придонесуваат за промоција на туристичките потенцијали на општините.

 

По одржаната промоција, беше организиран иницијален работен состанок во хотелот Свети Наум, со претставници на релевантните институции од двете земји.

 

Интервенција на ПСС на превојот „Баба“ на планината Галичица

Планинската Спасителна Служба вечерва интервенираше врз заглавен автомобил на превојот “Баба”, на планината Галичица. Изведувајќи редовни тренажни активности и анализа на состојбата и условите на планината, вечерва екипа на ПСС при Црвен крст Охрид, наиде на заглавен автомобил со двајца патници на превојот “Баба” и со помош на службено теренско возило асистираше во извлекување  на истото од снежните наноси, од кои целосно е блокиран превојот на патниот правец Р-2332, преку планината Галичица. ПСС апелира до љубителите на планината и зимските авантури, да бидат крајно внимателни на овој патен правец, кој во моментов на места има големи снежни наноси, замрзната подлога и одрони, кои ја загрозуваат безбедноста на учесниците во сообраќајот. Потсетуваме и дека истиот патен правец е со ограничен режим на сообраќај во зимскиот период, при што сообраќајот е дозволен само во должина од 9 км, од Трпејца до излетничко место “Корита”, додека останатиот дел е затворен за сообраќај.

Интервенција на Планинската Спасителна Служба

Денес во 13:46 ч. Планинската Спасителна Служба прими дојава од страна на СВР Охрид, за случена несреќа на карпест и тешко пристапен терен во месноста “Лабино”. Шестчлена екипа од ПСС, веднаш пристигна на местото на несреќата, но за жал, поради тежината на падот и сериозноста на повредите, беше невозможно да се направи било што за да се спаси животот на настраданото лице. По пад од голема висина, телото на настраданиот се наоѓаше во близина на езерската површина, каде со поддршка од пловен објект на граничната полиција, смртта ја констатира лекар од Итната медицинска помош по што беше спроведена соодветна увидна постапка за утврдување на причините за падот. ПСС при Црвен крст Охрид жали за немилиот настан и апелира до сите љубители на природата, да бидат особено внимателни, кога се движат на карпест и стрмен терен, каде поради ниските температури има појава на голомразица и постои опасност од подлизнување, со можност за сериозни последици.

Ден на безбедноста на планина

Црвениот Крст го одбележува 15 јануари како “Ден на безбедноста на планина”. По тој повод, Планинската Спасителна Служба при Црвен Kрст Охрид, го искористи вчерашниот ден за изведување на работни обврски и кондициски тренинг, со цел поставување на новиот репетитор за радио комуникација, кој значително ќе ги подобри капацитетите на Службата. Станува збор за репетитор, кој ќе ѝ овозможи на службата непречена комуникација во радиус од најмалку 50км, и со чија помош ќе биде покриен најголем дел од територијата на која делува ПСС Охрид. Репетиторот беше набавен во рамки на проектот “Регионот Охридско езеро – Безбедна дестинација за авантуристички туризам”, финансиран од Европската Унија, преку ИПА програмата за прекугранична соработка со Албанија.

Планинската Спасителна Служба при Црвен Крст Охрид, по овој повод упатува поздрави до сите колеги, волонтери и професионалци од спасителните служби низ светот, со искрени желби за успешна работа, многу заеднички планински дружби и што помалку спасителни операции.

Прва интервенција на ПСС во 2020 година

На 13.01.2020 год. во 13:50 од страна на СВР Охрид, Планинската Спасителна Служба при Црвен Крст Охрид прими повик за асистенција при извлекување на повредено лице во несреќа предизвикана од трактор на непристапен планински терен. Четиричлена екипа веднаш се упати кон с. Опеница, охридско, каде асистираше на екипата од Итната медицинска помош за успешно извлекување, имобилизација и транспорт со теренско возило на повреденото лице, кое се здобило со тешки телесни повреди. Повредениот беше транспортиран во специјалната болница за ортопедија и трауматологија „Св. Еразмо Охридски“ на понатамошно лекување. Акцијата заврши во 14:59ч.

 

СВ. КЛИМЕНТОВА ПОВЕЛБА ЗА ПЛАНИНСКАТА СПАСИТЕЛНА СЛУЖБА

На свечената академија која по повод празникот Св. Климент Охридски се одржа на 07.12.2019 година, во центарот за култура „Григор Прличев” во Охрид, на Планинската Спасителна Служба при Црвен крст Охрид ѝ беше доделено високото општинско признание „Повелба Св. Климент Охридски – Патрон на градот”, за успешно спроведениот прекуграничен проект и промоцијата на Охрид и регионот како безбедна дестинација за авантуристички туризам.

Признанието го прими раководителот на Планинската Спасителна Служба Антонио Додевски, кој во своето обраќање истакна дека волонтерите се основниот столб на службата и дека ова признание им припаѓа нив, а ја искористи приликата и да се заблагодари на Европската Делегација за финансиската подршка, доделена преку ИПА програмата за прекугранична соработка со Албанија.

Ова признание го примаме со огромна чест и одговорност и во иднина да продолжиме со истото темпо во развојот и издигнувањето на Планинското Спасување на уште повисоко ниво.

 

 

 

ЗНАЧАЈНО ПРИЗНАНИЕ ЗА УСПЕШНАТА СОРАБОТКА СО МИНИСТЕРСТВОТО ЗА ОДБРАНА

Во текот на вчерашниот ден, во опреативниот центар на ПСС имавме посета од делегација на Министерството за Одбрана, која ни врачи плакета со благодарност за ефективната досегашна соработка и изрази подготвеност за поддршка и интензивирање на соработката во иднина.

Ова признание и довербата која ја добиваме од страна на Министерството за Одбрана, како и од останатите државни институции, за нас претставуваат гаранција дека сме на вистинскиот пат и поттик да продолжиме по истиот курс, во напорите за издигнување на планинското спасување на повисоко ниво, согласно меѓународните стандарди.

Благодариме за укажаната доверба и се надеваме на успешна соработка и во иднина.

Промотивно видео за Планинската Спасителна Служба

Промотивно видео за Планинската спасителна служба при Црвен Крст Охрид, формирана во рамки на проектот „Регионот Охридско Езеро – Безбедна дестинација за авантуристички туризам“, финансиран од Европската Унија во рамки на ИПА програмата за погранична соработка меѓу Република Северна Македонија и Република Албанија, а имплементиран од страна на Црвен Крст Охрид и Национален центар за животна средина, туризам и одржлив развој од Албанија.

Бурна седмица за Планинската Спасителна Служба

Планинската спасителна служба при Црвен крст Охрид, во периодот од 12-ти до 18-ти Август 2019 година, имаше обемен ангажман, кој уште еднаш ја истакнува неопходноста од нејзиното постоење. На 12 и 13 август, тричлена екипа од ПСС со теренско возило даваше активна поддршка во гасењето на шумскиот пожар во атарот на село Велмеј, каде покрај својата примарна улога за спасување во случај на несреќа, значително помогна во транспорт на храна и вода за екипите кои гасеа на терен, како и за обиколка и извидување на теренот со членови од штабот за управување со активностите за локализација на пожарот. Дополнително, викендот на 17 и 18 Август, два тима од ПСС, на две различни локации вршеа обезбедување на планински настани на кои учество зедоа повеќе од 650 учесници. Првиот настан, кој беше во организација на Братството и Сестринството од Бигорскиот и Рајчичкиот манастир, а по повод празникот Св. Преображение се одржа на Врвот Крчин 2341мнв. На овој настан имаше околу 600 учесници од целата држава, кои учествуваа на заедничка Богослужба на врвот Крчин. За време на настанот, беа регистрирани неколку помали интервенции и една посериозна, при која жена на педесетина годишна возраст, поради слабост и срцеви тегоби беше неопходно да се евакуира од планината и да се транспортира до најблиската здравствена установа во Ростуше, каде и беше укажана лекарска помош. На овој настан, значителна поддршка на тимот од Планинсската Спасителна Служба при Црвен крст Охрид, беа Водичите во планина и волонтерите од тимот за Прва помош при Црвен крст од Битола, чија поддршка имаше големо значење за ефикасно обезбедување на овој навистина масовен планински настан. Вториот настан се одржа на планината Галичица ноќта на 17-ти Август, со наслов “Full Moon Experience” во организациа на Free Pass Ohrid, на кој учествуваа околу педесетина учесници, кои на полна месечина го искачија врвот Лако Сигној 1984мнв. Настанот помина без регистрирани интервенции од старна на ПСС. Во продолжение фотографии од споменатите активности