NATO – EADRCC DISASTER RESPONSE EXERCISE Ohrid 2021

Во Септември 2021 година, во Охрид ќе се одржи меѓународна вежба за одговор при катастрофи во организација на NATO – EADRCC (Euro-Atlantic Disaster Response Coordination Centre), на која ќе учествуваат специјализирани спасувачки тимови од повеќе НАТО земји.

Како составен дел од националниот систем за одговор при катастрофи, во подготовката на вежбата е вклучен и Црвен крст на Република Северна Македонија со неколку свои сектори, меѓу кои и Планинската Спасителна Служба при Црвен крст Охрид. На наша иницијатива, за прв пат на овој вид вежби, ќе бидат опфатени и сценарија со комплексни планински несреќи, кои нашите тимови ќе ги изведуваат во соработка со армиските тимови, како и со останатите спасителни служби од НАТО земјите, кои ќе изразат интерес за учество на вежбата.

Во моментов, во тек е подготвителниот дел, а од понеделник 14-ти јуни, до четврток 17-ти ќе се одржи и финалната планирачка конференција за вежбата, на која активно учество има и раководителот на ПСС Антонио Додевски. Планинската Спасителна Служба при Црвен крст Охрид, на планирачкиот комитет го понуди целокупниот свој кадров и материјално-технички капацитет за квалитетно и безбедно одвивање на вежбата.

Претходно, во текот на минатата година, капацитетите на ПСС беа евалуирани од страна на планирачкиот комитет, истите беа високо оценети и ќе бидат вклучени како значаен дел во подготовката и реализацијата на самата вежба. За време на вежбата во Септември, како составен дел од нашите тимови, ќе бидат вклучени и волонтери од останатите организации, членови на Националниот Сојуз за Планинско Спасување, со што активно ќе ја продолжиме мисијата за унифицирање на нивото и усогласување на стандардите за изведување на спасителните операции, кај сите членови на сојузот, а со тоа и во државата.

Вклученоста во самиот планирачки процес, како и активното учество во вежбата, за ПСС претставува сериозна можност за надградба на сопствените капацитети, подобрување на комуникацијата и координацијата со останатите домашни и меѓународни институции, како и наш придонес за афирмација и промоција на Охрид пред меѓународната стручна јавност од областа на спасувањето и заштитата на луѓето и добрата.

ДЕМАНТ на изнесените ставови на координаторите на советничките групи од општина Охрид

Почитувани сограѓани и медиуми,

Не можеме, а да не реагираме на вчерашните изјави на Градоначалникот и координаторите на советничките групи, кои се обидоа да ги релативизираат аргументите и да се оправдаат за нивната воздржаност, со што покажаа дека всушност немаат став, односно дека воопшто не се заинтересирани за ова прашање.

Имено, веруваме дека Градоначалникот има искрени намери и сериозно смета дека треба да се изнајде решение за одржливоста на Службата, но не можеме да се согласиме со изјавата дека Црвен крст Охрид барал средства за плати на волонтерите. Исто така, не можеме да се согласиме ниту со изјавите на координаторите на советничките групи, кои беа цитирани од страна на медиумите, во кои според едните „тие не добиле прецизни финансиски показатели, за тоа колку чини функционирањето на Службата и со кој дел би учествувала општината во вкупните трошоци“, а според другите дека „се изјасниле воздржано од единствена причина, што предлог одлуката не поседувала финансиска конструкција и јасни показатели, во однос на точната намена на средствата кои се бараат да бидат доделени од општинскиот буџет“. Од овие изјави, единствено може да се заклучи, дека советниците од власта и од опозицијата или воопшто не се заинтересирани за ова прашање или делуваат под влијание на други центри на моќ, кои им диктираат како треба да гласаат.

Инаку, барањето за поддршка на Службата се темели на деталните анализи и проценки од Студијата за финансиска одржливост, која ја работеа врвни експерти од областа, согласно кои општините би требало да учествуваат со 50% во вкупниот буџет на Службата, државата во иднина преку Дирекцијата за заштита и спасување (или во друга форма) со 30% и 20% Службата би обезбедувала од донации и дополнителни услуги. Во вкупната пресметка на буџетот, покрај материјалните трошоци за одржување на целокупниот систем, предвидени се и трошоци за осигурување, стручно усовршување и покривање на трошоците на волонтерите кои ги прават за време на редовните тренажни активности и спасителните операции, кои во случајов очигледно се помешани со терминот „плати“.

До овој момент, Службата не добила ни денар од локалните власти во изминатите 19 години и сѐ што е постигнато, е постигнато благодарение на ентузијазмот на волонтерите, кои покрај својата пасија за алпинизам, планинарство и спасување на човечки животи, професионално и интелектуално се реализирани личности и докажани професионалци во своите области (инженери, архитекти, адвокати, лекари и сл.), кои не очекуваат „плата“ како награда за она што го прават доброволно, туку очекуваат соодветен третман и грижа за нив, од системот во кој го вложуваат сопственото здравје. Нивниот ентузијазам и несебично залагање, во Охрид донесоа инвестиции од Европските фондови и изградија ефикасен систем, за чии резултати и финансиско работење добивме највисоки оценки од страна на донаторите. Очигледно овој систем на европски вредности советниците не можат или не сакаат да го разберат, иако како што изјавуваат се свесни за неговото значење.

Ние ќе продолжиме и понатаму, со несмалено темпо, бидејќи знаеме дека прогресот и напредокот на општеството го носат ентузијазмот и стремежот кон високи цели, компарирани со високите светски достигнувања. На тој пат, сакаме да ги поттикнеме и да ги мотивираме останатите колеги, ентузијасти од другите дејности, активно да се вклучат во градењето на здраво општество и заедно, очигледно низ долготраен процес, да ги едуцираме идните генерации политичари и советници, за вредностите кои егзистираат во развиениот свет, а кои е неопходно  да се имплементираат и кај нас, доколку сакаме да сме дел од светот. Тука сме, да им помогнеме на сите кои ја разбираат и сакаат да се дел од оваа мисија, бидејќи како што имаме кажано многу пати до сега, ние така го разбираме патриотизмот.

Бидејќи очигледно е дека советниците не ја прочитале или не ја разбрале Студијата, во оваа прилика, уште еднаш ги повикуваме да го направат тоа, иако со нивниот чин на воздржаност на последната седница, веќе се иззедоа од можноста за истото повторно да одлучуваат, со оглед на тоа што согласно деловникот, истата точка не смее да биде повторно на дневниот ред на советот во следните 6 месеци, период во кој нивниот мандат веќе ќе биде истечен.

На крајот, може само да заклучиме, дека овој состав на Советот на општина Охрид, две години (половина мандат) остана без став, во однос на важноста и значењето на Планинската Спасителна Служба за локалното население и за туристичкиот сектор, по што ќе биде запаметен во историјата на Планинското спасување во Охрид, но и во државата.

Во оваа прилика изразуваме благодарност до сите граѓани кои во овој процес ни изразуваат безрезервна поддршка, како и на сите организации со кои континуирано соработуваме и меѓусебно се поддржуваме.

Овде ќе завршиме, бидејќи обврските не ни дозволуваат да одвоиме повеќе време, а и сметаме дека на јавноста сѐ и е повеќе од јасно.

ЗА ОНИЕ КОИ САКААТ ПОВЕЌЕ ДЕТАЛИ ЗОШТО НЕ СЕ СОГЛАСУВАМЕ СО ИЗНЕСЕНИТЕ СТАВОВИ, ВО ХРОНОЛОШКИТЕ НАСТАНИ ПОДОЛУ:

  1. На 09.07.2019 г. во кабинетот на Градоначалникот Георгиевски, се одржа работен состанок на кој присуствуваа и градоначалниците на Струга, Вевчани и Дебарца, на кој детално им беше презентирана студијата за одржливост на Планинската Спасителна Служба и сите се согласија да се започне процес за заедничкко решавање на ова прашање.
  2. На 24.10.2019 г. во општина Охрид, Градоначалниците на Вевчани и Дебарца, потпишаа Меморандуми за соработка, а Градоначалникот на општина Охрид, поради отсуство во моментот истиот го потпиша подоцна на 15.11.2019 година.
  3. Барањето за финансиска поддршка од општината е во согласност со деталните финансиски параметри изложени во Студијата, која е доставена до службите на општина Охрид, во печатена и електронска форма, а истата може во секое време да се спушти од веб страната на ПСС (https://pss.org.mk/za-nas/)
  4. Покрај деталните и темелни финансиски параметри, во студијата е направена и компаративна анализа на организацијата на службите за спасување во 4 европски држави, како и прецизна правна анализа на позитивните законски прописи во државата, според кои општините се обврзани да формираат тимови за заштита и спасување на населението, како и да издвојуваат финансиски средства за таа намена.
  5. На 23.11.2020 г. се одржа on line координација на советничките групи, на која присуствуваа претседателот на Црвен крст Охрид и Раководителот на ПСС, кои на присутните советници детално им ја претставија работата на ПСС, како и резултатите од Студијата, врз основа на кои се базира и барањето за финансиска поддршка.
  6. На 21.12.2020 г. до градоначалниците и до советниците од регионот, беше испратено писмо од страна на Европската Делегација во Скопје, со укажување дека процесот за поддршка на ПСС е закочен и дека истиот треба да се интензивира во следниот период.

 

Со почит,

Ваша Планинска Спасителна Служба при Црвен крст Охрид

Власта и опозицијата во Охрид за прв пат се обединија и тоа против Планинската Спасителна Служба при Црвен крст Охрид

И покрај стотиците успешни интервенции во изминатите 19 години, и покрај огромните жртви на волонтерите кои го ризикуваат сопственото здравје и живот за да го ублажат страдањето на другите, и покрај силната поддршка од Европската Унија и писменото укажување до Градоначалникот и Советниците, сепак на денешната седница, Советот на општина Охрид, речиси едногласно ја отфрли одлуката за финансиска поддршка на единствената служба во државата, која за граѓаните на територијата која ја покрива, нуди 24 часовна услуга по највисоките светски стандарди. Со ова, Советот на општината потврди дека безбедноста и здравјето на граѓаните им е на последно место во приоритетите.

Иако само оваа година во најмалку пет наврати, со нашите брзи и успешни интервенции ја спасивме општината од медиумски напади слични на неодамнешниот „кратовски случај“, сепак тоа не го направивме за политичарите и нивните суети, туку за граѓаните, кои благодарение на истите тие политичари, најчесто се оставени на милост и немилост, особено кога станува збор за спасувањето и заштитата.

Засрамени што воопшто припаѓаме на ова време, во кое комплетно се обезвреднува човечкиот живот, во оваа прилика сакаме да им заблагодариме на Градоначалникот и Советниците, за лажната поддршка која при секоја средба ни ја изразуваат и која официјално ја потврдија со доделувањето на Свети Климентовата повелба за 2019 година. Од истата јавно се откажуваме, со едногласна одлука на сите волонтери од Службата и во текот на следните денови официјално ќе ја вратиме во Општината.

Остануваме во служба на граѓаните и понатаму, сѐ додека можеме тоа да го издржиме, правејќи го она кое најдобро го знаеме за нашите сограѓани, бидејќи нашата најголема награда се солзите радосници од луѓето на кои им помагаме и нивните семејства.

Се надеваме дека ваквата едногласна одлука на Советот, ќе остане длабоко запишана во историјата на општина Охрид, како пример за останатите состави на Советот, но и како одлика на времето во кое живееме, време во кое властите најниско ги вреднуваат човечкиот живот и волонтерскиот труд на сопствените граѓани, оние на кои треба да им служат.

НЕКА ИМ СЛУЖИ НА ЧЕСТ!

Потрага по залутан собирач на шумски плодови

Хируршки прецизно, согласно досегашната статистика, во периодот мај-јуни ПСС добива по неколку СОС повици за залутани или повредени собирачи на шумски плодови. Токму еден таков повик, денес во 17:15ч. пристигна од граѓани, кои пријавија дека нивни роднина поради невремето кое попладнево го зафати регионот, е дезориентиран на планината и во состојба на хипотермија. За среќа, лицето располагаше со полна батерија на мобилниот телефон и пристап до мобилната мрежа речиси во целиот период на операцијата и беше во непрекинат контакт со оперативниот центар, кој му даваше упатства и се обидуваше да го лоцира. Паралелно, седумчлена екипа на ПСС со теренско возило се упати кон високите делови на планината, за да не се губи време од лоцирањето до евентуалното пресретнување на лицето.

Оперативниот центар, по добивање на повикот, ја извести и полицијата која исто така излезе на терен со една патрола. По кратко време лицето информираше дека излегло на широк земјен пат и во комуникација со тимот, беше одлучено да се движи надолу по истиот, кој според описот треба да слегува во селото Велгошти, што и се потврди на крајот. Во 19:17 часот, лицето излезе на асфалтен пат, каде беше пречекано од патролата на СВР Охрид.

Нестабилната метеоролошка состојба во овој период од годината, лошата подготвеност и опременост, како и потценувањето на планината, се најчести причини за залутување и повреди кај собирачите на шумски плодови. Поради тоа, апелираме на особено внимание, редовно следење на метео прогнозите, движење во групи од најмалку две лица, соодветна опременост, носење на доволни количини на храна и течности, како и мобилни телефони со полни батерии. Во случај на било какви незгоди, од огромно значење е брзото и навремено алармирање на ПСС, за да се спречи дополнителна компликација на состојбите.

Остварени средби со г-дин Елвис Али, програмски директор на Делегацијата на ЕУ во РСМ и претставници на JTS (Joint Technical Secretariat IPA CBC MK/AL)

Во текот на изминатата недела остваривме средби со г-дин Елвис Али, програмски директор на Делегацијата на ЕУ за ИПА 2 Програмата за прекугранична соработка меѓу Р. Северна Македонија и Р. Албанија и со претставници на Министерството за Локална Самоуправа од РСМ и Министерството за Европски Работи од Албанија.

На средбите беше презентирана старата училишна зграда во с. Брежани, која треба да биде реконструирана и адаптирана во планинарски дом. Ова е уште една активност која се реализира во рамки на проектот „Нови можности за безбеден зимски авантуристички туризам“, финансиран од ЕУ и Министерството за Локална Самоуправа на РСМ, преку ИПА 2 програмата. Од страна на проектниот менаџер, г-дин Антонио Додевски и градоначалникот на општина Дебрца, г-дин Зоран Ногачески, на гостите им беа презентирани веќе реализираните активности од овој проект: специјализирано теренско возило Dacia Duster за општина Дебрца и дополнителна опрема за спасување во зимски услови. Во оваа општина предвидени се уште и реконструкција на пропустите од село Брежани до Илинска црква, како и обуки за спасување на пристапен, нетехнички терен.

По ова следуваше посета на Оперативниот центар на Планинската Спасителна Служба, каде гостите имаа можност да се запознаат со новонабавените АТВ возила и специјализираната опрема за спасување во зимски услови.

И во оваа прилика, уште еднаш би сакале да ја изразиме нашата благодарност до Делегацијата на ЕУ во РСМ и до Министерството за Локална Самоуправа, како и подготвеноста за понатамошна соработка.

„Агенда 35“ за искористеноста на ЕУ фондовите и нашата успешна приказна на патот кон Европа

Успешната приказна на Планинската Спасителна Служба при Црвен крст Охрид препознаена од европските донатори. Со заедничка реализација на прекугранични проекти, воведување на меѓународни препораки и стандарди, инвестиции во едукација, инфраструктура и современа опрема преку искористување на средства од ИПА Програмата, нашата земја се приближува кон европското семејство. За успешна реализација на проектите и постигнување на врвни резултати, неопходни се јасна цел, стратешко планирање и ефикасен менаџмент со процесите согласно европските критериуми. Докажавме дека знаеме и можеме во сферата на планинското спасување да направиме квантен скок и за граѓаните во нашиот регион да обезбедиме врвни услуги.

Во продолжение погледнете го нашето гостување во емисијата Агенда 35.

Асистенција за поддршка на едрењето во Охрид и подигнување на еколошката свест за одржливо искористување на природните ресурси

Денес, од раните утрински часови, по барање на едриличарите од Охрид, беше спроведена асистенција за спуштање на пловни објекти во Охридското Езеро. Едриличарите со години се соочуваат со апсурден проблем поради непостоење на современа марина за чување на нивните пловни објекти, езерските бисери. Истите се принудени да ги чуваат по нивите, оддалечени неколку километри од езерото, кревајќи ги и спуштајќи ги секоја наредна сезона.

Како промотори на одржливиот туризам и борбата за зачувување на животната средина за идните поколенија, ја делиме истата судбина со едриличарите. Делејќи го нивниот силен ентузијазам, активно се вклучивме со поддршка во нивните напори и борба за што поголем број едрилици, наместо бензиски пловни објекти, да го красат Охридското Езеро.

Покрај ентузијазмот, со едриличарите зедничко ни е и отсуството на поддршка од локалните и државните власти, што уште повеќе нѐ мотивира да се поддржуваме и да си помагаме меѓусебно.

Стоиме на располагање на сите љубители на природата и промотори на еколошки одржливи форми на туризам во нашиот град. Како и до сега ќе продолжиме, во рамките на нашите можности и сили, бесплатно да ги помагаме ваквите активности.

Секогаш тука за Охрид и охриѓани,

Ваша Планинска Спасителна Служба

Несреќа во атарот на село Коњско, Охрид

Денес во 11:15ч. оперативниот центар на Планинската Спасителна Служба, беше алармиран од група домашни туристи, кои со изнајмени АТВ возила изведувале авантуристичка Off Road тура, при што едно возило со двајца патници излетало од патот и се превртело во провалија длабока десетина метри. Екипа од ПСС веднаш се упати на терен, а оперативниот центар ги извести СВР Охрид и Итната Медицинска Помош. Тимот на ПСС во 11:30ч. пристигна на место на несреќата, каде врз две лица (машко и женско), и двете со политрауми, им беше укажана прва помош и согласно протоколот за ваков вид интервенции истите беа целосно имобилизирани и со теренско возило транспортирани до возилата на Итната Помош, кои чекаа на најблиската пристапна точка. Во 12:10ч. двете повредени лица беа предадени на ИМП и пренесени на понатамошен болнички третман.

Во оваа прилика, сакаме да апелираме до туристичките работници и до лицата кои се корисници на услуги во авантуристичкиот туризам, да ги почитуваат и строго да се придржуваат до безбедносните правила, а во случај на несреќа, особено од ваков вид, каде најчесто станува збор политрауми со можни сериозни последици, веднаш да нѐ алармираат и да ги чекаат нашите тимови.

Бурно тримесечје за ПСС

Во периодот од 01.01.2021 до 31.03.2021 година, Оперативниот центар на Планинската Спасителна Служба при Црвен крст Охрид, регистрира рекордни 27 повици, од кои во 22 наврати интервениравме на терен, а во 5 само со совети преку телефон.

Покрај големиот број повици, нетипична беше и појавата во еден ден да имаме по два повици, како и природата на интервенциите, од кои една интервенција со сериозни повреди, една интервенција за достава на храна и лекови на бачило оддалечено 3 км од село Свињишта, две асистенции за извлекување на беспилотни летала заглавени на дрво, 17 асистенции врз заглавени возила во снег на превојот Баба на Галичица и една интервенција за спасување на домашно милениче.

Сите овие интервенции и нивната природа, укажуваат на сѐ поголемата активност на планините, како и на довербата која ја имаат граѓаните од регионот во Планинската Спасителна Служба и сигурноста дека на секој повик, ќе добијат брза и ефикасна помош. Иако најголемиот дел од интервенциите беа поради несовесноста на граѓаните кои не ги почитуваа сообраќајните правила и забраната за движење на превојот од Галичица, сепак нашата совесност не дозволи да останеме глуви, токму поради самиот факт дека станува збор за луѓе кои се заглавени на надморска висина  од 1650 м, на сурови зимски услови. Овој вид асистенции не се дел од нашата примарна дејност и ни одземаат голема енергија, но и ресурси кои би можеле во истиот момент да бидат потребни за спасување на човечки животи.

Првото тримесечје од годината, го одбележа и пристигнувањето на новите специјализирани АТВ возила и опремата за спасување во зимски услови, како и големиот број тренажни денови со истите. Овие возила и опремата, се набавени во рамки на вториот проект кој Црвен крст Охрид во соработка со Алпинистички клуб ПАТАГОНИЈА Охрид, Општина Дебрца и Општина Грамш од Албанија го спроведуваат со финансиска поддршка од Европската Унија, преку ИПА програмата за прекугранична соработка со Албанија. Целта е унапредување и јакнење на системот за спасување на планина во прекуграничниот регион, со што значително ќе се подобри конкурентноста на истиот во однос на другите региони за развој на авантуристички туризам.

Ви посакуваме безбедни планински авантури и добро здравје.